Eggert er hættur við málsókn gegn Björgólfi

Eins og kunnugt var af fréttum fyrir rúmu ári síðan ætlaði Eggert í mál við Björgólf til að kerfjast vangoldinna launa upp á um eina milljón punda eða rúmlega 200 milljóna kr. af Björgólfi.

David Sullivan sem keypti 50% hlut í West Ham í vikunni ásamt David Gold hefur skellt skuldinni á Eggert fyrir bága fjárhagsstöðu West Ham. Segir hann ástæðuna fyrir stöðunni vera glórulausar ákvarðanir Eggerts í leikmannakaupum og launagreiðslum til þeirra.

Eggert spyr í The Sun hvort menn haldi virkilega að hann hafi einn og sér tekið ákvarðanir um leikmannakaupin. Þau hafi verið gwerð með vitund, vilja og samþykki annarra sem stjórnuðu liðinu, þar á meðal þáverandi framkvæmdastjóra liðsins Alan Curbishley.

„Og fólk hefur fljótt gleymt því að okkur tókst að halda liðinu í úrvalsdeildinni á þessu fyrsta ári okkar og það var kraftaverk," segir Eggert.

Hvað varðar háðuleg orð Sullivan um að Eggert vildi koma aftur til liðs við West Ham segir Eggert að hann hafi aldrei talað við Sullivan og þekki hann ekki. Hann hafi hinsvegar haft samband við David Gold fyrir nokkrum síðan því hann þekkti fjárfesti sem hafði áhuga á liðinu.

Þá kemur fram í máli Eggerts að mögulega hafi hann verið blekktur á þeim tíma sem hann var stjórnarformaður liðsins. „Kannski var mér talin trú um að meira fjármagn hafi verið til reiðu en síðan reyndist," segir Eggert. „Mér var sagt að mikið af fé væri til staðar til að gera hluti."

Eggert segir að hann telji þá Sulivan og Gold bestu mennina til að taka við stjórn West Ham núna. Þeir hafi sína eigin peninga til að setja í liðið en ekki „pappírspeninga eða lán frá bönkum," eins og hann orðar það.