Tapaði í fyrsta sinn í sjö ár eftir að hafa leikið 57 landsleiki í röð án taps

Miðvörðurinn Carlos Marchena var í tapliði Spánar á móti Argentínu í vináttuleik í Buenos Aires í gær. Marchena var fyrir leikinn búinn að margbæta heimsmet Brasilíumannsins Garrincha með því að spila 57 landsleiki í röð án þess að tapa.

Carlos Marchena hafði ekki tapað í landsliðsbúningi Spánverja síðan 7. júní 2003 þegar spænska liðið tapaði á móti Grikklandi í undankeppni EM 2004. Liðið hafði síðan þá unnið 47 leiki og gert 10 jafntefli í þeim 57 landsleikjum sem hann hafði tekið þátt í.

Marchena sló met Garrincha 29. maí í sigurleik gegn Sádí-Arabíu þegar hann lék sinn 50. landsleik í röð án þess að tapa. Eina tap Garrincha með landsliði Brasilíu var í hans 50. og síðasta landsleik á ferlinum.

Það munaði mjög litlu að leikirnir hafi aðeins orðið 56 í röð því Spánverjar náðu að tryggja sér 1-1 jafntefli á móti Mexíkó í leiknum á undan með marki David Silva í uppbótartíma.

Tveir aðrir leikmenn spænska landsliðsins í leiknum í gær höfðu aldrei tapað með landsliðinu. Pepe Reina, markvörður Liverpool, hafði ekki tapað í 20 landsleikjum og Alvaro Arbeloa, varnarmaður Real Madrid, hafði leikið 17 landsleiki án þess að tapa.