Stofnendur Google leysa til sín tæpa 700 milljarða

Stofnendur Google, þeir Larry Page og Sergey Brin, ætla að selja hlutabréf í sinni eigu í Google fyrir 5,5 milljarða dollara eða tæpa 700 milljarða kr. á næstu fimm árum. Við þetta minnkar eignarhlutur þeirra í Google úr 59% og niður í 48%.

Í umfjöllun um málið í Computerworld segir að þeir Page og Brin hafi ekki í hyggju að láta af störfum sínum fyrir Google og verða þar áfram í forsvari. Í yfirlýsingu frá Google sem Bloomberg fréttaveitan birtir segir að þeir félagar verði jafnmikð þátttakendur í daglegum rekstri Google og vöruþróun og verið hefur frá upphafi.

Google var stofnað árið 1998 af þeim Page og Brin en þá voru þeir í námi við Stanford háskólann.

Þegar Google var skráð á markað árið 2004 var gengi hlutanna 85 dollarar. Um síðustu áramót var gengi þeirra 445 dollara. Þetta er hækkun um 420% á þessu tímabili. Til samanburðar má nefna að vísitalan á Nasdaq markaðinum hækkaði um 8% á sama tímabili.

Google er langstærsta leitarvélin á netinu. Á árunum frá 2004 hefur Google síðan eignast Youtube, netauglýsingafyrirtækið Double Click og netörggisfyrirtækið Postini.