Kína orðið stærsti markaðurinn fyrir Bordeaux vín

Kína hefur velt Bretlandi og Þýskalandi úr sessi sem stærsti útflutningsmarkaður fyrir frönsk Bordeaux vín í heiminum, mælt í verðmæti. Kínverjar eru í auknum mæli að fá smekk fyrir góðum vínum.

Fjallað er um málið í Financial Times en þar segir að sala á Bordeaux vínum til Kína hafi tvöfaldast milli ára á síðustu fimm árum. Á fyrri helmingi þessa árs varð verðmæti útflutnings á Bordeaux vínum meira til Kína en Bretlands í fyrsta sinn og nam verðmætið 90 milljón punda, eða tæpum 16,5 milljörðum kr.

Thomas Julien markaðsstjóri CIVB, sem markaðssetur Bordeaux vínin, segir að fyrir 5 til 6 árum vildu Kínverjar ekki einu sinni smakka á þessum vínum heldur spurðu bara um verðlistann. Nú gera þeir sér grein fyrir að vín snúast ekki bara um merki og verð.

Fram kemur að fyrir utan hefðbundin borðvín séu Kínverjar, og Hong Kong búar, í auknum mæli farnir að kaupa þekkt árgangsvín dýrum dómum. Á uppboði nýlega í Hong Kong var flaska kassi af 1990 árganginum af La Tache Domaine de la Romanée Conti seldur á yfir 50,000 dollara og kassi af 1989 árganginum af Chateau Petrus seldist á rúmlega 40.000 dollara.