Federer úr leik á Wimbledon

Roger Federer er úr leik á Wimbledon-mótinu í tennis eftir að hann tapaði fyrir Tékkanum Tomas Berdych í fjórðungsúrslitum einliðaleiks karla.

Berdych vann sannfærandi sigur á Federer sem er ríkjandi meistari, 6-4, 3-6, 6-1 og 6-4. Óhætt er að segja að þetta sé stærsti sigur Berdych á ferlinum en hann hefur lengst komið í 4. umferð á Wimbledon-mótinu hingað til.

Hann komst reyndar einnig í undanúrslit á opna franska meistaramótinu fyrr í mánuðinum en tapaði þá fyrir Svíanum Robin Söderling.

„Það er erfitt að útskýra hvernig mér líður núna. Þetta er alveg ótrúlegt," sagði Berdych eftir sigurinn.

Federer hefur sex sinnum fagnað sigri á Wimbledon-mótinu og alltaf komist í úrslitaleikinn síðan 2002.

Berdych mætir Novak Djokovic í undanúrslitum en hann bar sigurorð af Ly Yen-hsun frá Taipei, 6-3, 6-2 og 6-2.