Formúlu kappi nærri gini hákarls

Paul di Resta sem keyrir Formúlu 1 bílí fyrsta skipti á æfingum í Melbourne á föstudag fékk aðra frumraun í flasð í dag. Hann stóð nærri hákarli á strönd við Melbourne, sem var kannski ekki besta auglýsingin fyrir ferðamennskuna á staðnum. Hákarlinn hafði fest sig í flæðarmálinu. "Þetta er í fyrsta skipti sem ég kem til Ástralíu og í fyrsta skipti sem ég fer á ströndina. Innan tveggja mínútna var ég búinn að sjá hákarl, sem færði mér ekki aukið sjálfstraust til að taka sundsprett", sagði Paul Di Resta sem ekur með Force India á æfingum og er varaökumaður liðsins fyrir þá Adrian Sutil og Viantonio Liuzzi. Hann hefur m.a. keppt í 3 ár í DTM mótaröðinni þýsku með ágætum árangri. Hann var undir handleiðslu Mercedes, sem útvegar einmitt Force India vélum í Formúlu 1. "Þetta var nokkuð stór hákarl, var eitthvað fastur. Hann var aðeins í sex feta fjarlægð frá okkur. Ég held að hollenskur sjónvarpsmaður hafi losað hann úr prísundinni, en ég var sá fyrsti til að taka eftir honum. Hann synti þarna í 10 mínútur og löggan mætti á þyrlu til að kanna málið." Óvenjuleg byrjun á annasamri vinnuviku fyrir di Resta sem keyrir Force India bílinn á föstudag. "Vonandi get ég sýnt liðinu hvað í mér býr í keppni í framtíðinni. Núna er málið að fá reynslu á mismunandi brautum, þannig ef tækfiæri gefst að keyra, þá er ég tilbúinn. Mig hlakkar til að keyra bílinn, en kannski bagalegt fyrir ökumennina sem fá ekki allan þann æfingatíma sem er í boði", sagði di Resta.