Hótel d‘Angleterre býður upp á innkaupaþræl

Það er yfirleitt ekki á færi neinna nema þeirra ofurríku að hafa sérstakan innkaupaþræl (personal shopper) í þjónustu sinni.Nú hefur lúxushótelið d'Angleterre í Kaupmannahöfn ákveðið að bjóða gestum sínum upp á þessa þjónustu. Hótelið er komið í eigu skilanefndar Landsbankans eftir gjaldþrot Nordic Partners í fyrra.

Í umfjöllun um málið á börsen.dk segir að það sé hin fertuga Christine Wedel sem ráðin hefur verið innkaupaþræll hótelsins. Hún er sögð sjóuð í þessu fag og hefur verið á launaskrá nokkurra ofurríkra einstaklinga og annarra við að annast innkaupin fyrir þá.

Börsen segir að Wedel sé eins og sköpuð í þetta starf, sem blaðið segir eitt mesta „glamúr" starfið í Danmörku, vegna gáfna og hæfileika en hún er jafnframt einhver eftirsóttasti stílisti landsins.

Víst er að þjónusta Wedel er ekki gefin. Það kostar 7.000 danskar kr., eða 140 þúsund kr., að ráða hana í vinnu í einn dag. Innfalið eru ferðir til Helsingör og heimsóknir á danskt heimili og listasöfn. Hinsvegar má komast af með helmingi minni greiðslu ef aðeins er um að ræða að senda Wedel út að versla fyrir sig.