Ronaldo skoraði tvö mörk og var rekinn af velli

Það er óhætt að segja að Cristiano Ronaldo hafi stolið senunni er Malaga sótti Real Madrid heim í spænsku úrvalsdeildinni í kvöld.

Ronaldo skoraði tvö góð mörk á 35. og 39. mínútu og kom Real þar með í 2-0.

Á 70. mínútu lét hann skapið hlaupa með sig í gönur enn eina ferðina. Varnarmaður Malaga hékk þá í honum og Ronaldo svaraði því með að slá varnarmanninn í andlitið.

Dómarinn vel staðsettur og hann rak Ronaldo réttilega af velli.

Tíu leikmenn Real áttu samt í fullu tré við Malaga og lönduðu sigri með mörkum Ronaldos.

Real minnkaði um leið forskot Barcelona á toppnum niður í fimm stig.