Hlutabréfaútgáfa upp á 8 milljarða hjá West Ham

8. febrúar 2010 08:32

Skriður er kominn á hugmyndir þeirra David Sullivan og David Gold um að fá nýtt fjármagn inn í rekstur enska úrvalsdeildarliðsins West Ham. Framundan er útgáfa á nýjum hlutabréfum fyrir allt að 40 milljónir punda eða um 8 milljarða kr.

Í fréttum um málið í Financial Times og á BBC segir að þeir Sullivan og Gold segjast einkum ætla að nota þetta nýja fjármagn til að grynnka á skuldum liðsins. Þær nemi um 100 milljónum punda í augnablikinu.

Í Financial Times segir hinsvegar að ákvörðun þeirra félaga að auka hlutaféið svo skömmu eftir að hafa eignast West Ham tengist áformum um að West Ham yfirtaki Olympíuleikvanginn í Stratford árið 2012 eftir að leikunum lýkur. Bresk stjórnvöld höfðu afskrifað þessa hugmynd fyrir þremur árum en eru nú tilbúin að skoða hana að nýju..."ef peningar eru á borðinu," eins og Tessa Jowell ráðherra Olympíuleikanna segir.

Hlutabréfaútboðið verður lokað og er ætlunin að efnaðir stuðningsmenn liðsins fái að taka þátt í því. Aðkoma fagfjárfesta er þó ekki útilokuð að sögn Karren Brady aðstoðarforstjóra liðsins.

Það er Shore Capital sem stendur að útgáfunni fyrir hönd eigenda liðsins. Graham Shore einn af eigendum Shore Capital segir að það sé betra að taka á skuldastöðu liðsins strax en að bíða með að grynnka á henni.