Hafa heitið því að leggja 290 milljarða í tilboð i United

Sextíu vellauðugir fjárfestar hafa heitið því að leggja til samtals 1,5 milljarð sterlingspunda, eða tæpa 290 milljarða íslenskra króna, vegna fyrirhugaðs tilboðs í enska knattspyrnuliðið Manchester United. Þetta er fullyrt í breska blaðinu Times í dag.

Blaðið segir að þrátt fyrir að Glazer fjölskyldan hafi lýst því yfir að liðið væri ekki til sölu myndu forystumenn Rauðu riddaranna, hópsins sem hyggst gera tilboð í liðið, fara yfir stöðu mála í dag.

Einn af Rauðu riddurunum sagði í gær að vonast hefði verið til að ná saman um 40 fjárfestum sem gætu lagt sitt af mörkum í tilboðinu. En þeir væru nú þegar orðnir sextíu.

Þetta gæti þýtt að tilboð í þetta geysivinsæla knattspyrnulið yrði að veruleika innan skamms. Tilboðið yrði þá ef til vill svo hátt að varla væri hægt að hafna því.

Rauðu riddararnir telja að verðmæti knattspyrnufélagsins nemi einum milljarði sterlingspunda eða um 190 milljörðum íslenskra króna. Glazer fjölskyldan telur hins vegar að verðmæti liðsins nemi 1,2 milljörðum sterlingspunda.