Ferrari stefnir á titilinn með sigri í lokamótinu

Stefano Domenicali yfirmaður hjá Ferrari segist ekki ætla að reikna út alla hugsanlega möguleika sem kunna koma upp varðandi titilmöguleika Fernando Alonso hjá Ferrari í keppni Formúlu 1 ökumanna í lokamótinu í Abu Dhabi um næstu helgi.

Red Bull tryggði sér titil bílasmiða í Brasilíu í gær, en enn á eftir að útkljá hver verður heimsmeistari ökumanna.

Alonso er meðal fjögurra ökumanna sem geta orðið meistarar í síðasta móti ársins um næstu helgi, en hinir eru Mark Webber og Sebastian Vettel hjá Red Bull og Lewis Hamilton hjá McLaren. Alonso er efstur að stigum í stigakeppni ökumanna. Alonso er í ágætri stöðu hvað stigin varðar, en ef Webber vinnur mótið, þá verður Alonso að ná öðru sæti.

"Við munum ekki breyta okkar aðferðafræði okkar. Við verðum að hugsa um okkur og þurfum ekki að reikna út möguleikanna. Við vitum að ef við erum inn á milli Red Bull bílanna þá gengur þetta upp, en að öðru leyti þurfum við að gæta þess að vera hraðskeiðir. Það þarf að ganga fullkomlega í tímatökunni og við verðum að leggja okkur fram", sagði Domenicali í frétt á autosport.com.

"Við verðum að bíða fram á síðustu stundu, þar sem þolgæði bílanna er atriði og verður áhyggjuefni hjá öllum og ekki bara vegna vélanna, heldur bílsins í heild. Þetta verður löng keppni í Abu Dhabi."

Domenicali telur að Red Bull ökumennirnir séu í sterkari stöðu þar sem þeir eru tveir, en hann telur að Ferrari menn verði að einbeita sér að því sem þeir eru að gera, ekki hvað aðrir eru að gera. Ferrari menn verði að fljótastir í tímatökum og kappakstrinum og sá sem vinnur verði verðugur meistari.

Vettel vann mótið í Abu Dhabi í fyrra og Webber varð í öðru sæti og aðspurður um hvort Ferrari gæti unnið lokamótið sagði Domenicali;

"Við munum reyna. Þetta er auðveldara mál ef við vinnum. Þá þarf ekki að reikna stigin. En við vitum að Red Bull liðið er sterkt og var öflugt á brautinni í fyrra. Á móti kemur að við vorum hættir framþróun bílsins í fyrra. Þetta verður verðugt verkefni", sagði Domenicali.