Markvörður Juve barði í borð og handleggsbraut sig

Antonio Chimenti, markvörður Juventus, spilar ekki fótbolta á næstunni eftir að hafa handleggsbrotið sig á afar klaufalegan hátt svo ekki sé nú meira sagt.

„Ég var afar stressaður þegar ég kom inn í búningsklefann þannig að ég lamdi í borð. Því miður þá brotnaði hendin í leiðinni," sagði Chimenti.

Hann fór í leiðinni með gott tækifæri fyrir sjálfan því hann er aðeins þriðji markvörður liðsins en var að fá tækifæri þar sem bæði Gianluigi Buffon og Alex Manninger eru meiddir. Juve hefur því misst þrjá markverði í meiðsli á einum mánuði.

Juve á leik næsta fimmtudag og sem betur fer fyrir félagið verður Manninger líklega klár í slaginn.