Rolls-Royce selst eins og heitar lummur í kreppunni

Bresku lúxusbílarnir Rolls-Royce seljast eins og heitar lummur mitt í kreppunni. Bíllinn er uppseldur hjá framleiðandanum langt fram á haustið.

Samkvæmt upplýsingum frá Rolls-Royce í Goodwood á Englandi nær biðlistinn eftir nýjum glæsivögnum frá þeim að minnsta kosti fram í lok september.

Aldrei fyrr í sögunni hafa jafnmargir Rolls-Royce bílar rúllað af færibandinu og þessa daganna sökum þess að eftirspurn eftir þeim hefur vaxið gífurlega. Hér skal tekið fram að Rolls-Royce framleiðir aðeins 30 bíla á mánuði, 15 af tegundinni Phantom og 15 af Ghost þegar keyrt er á fullum afköstum.

Salan það sem af er árinu hjá Rolls Royce nemur 300 bifreiðum og er þetta fjórfalt meiri sala en á sama tímabili í fyrra. Ástæðan fyrir þessari auknu sölu er mikil eftirspurn eftir Rolls-Royce í Kína en jafnframt hefur eftirspurnin aukist á hefðbundum mörkuðum fyrirtækisins.

Það er einkum Ghost gerðin sem selst vel en sá bíll er ekk gefinn. Ghost kominn á íslenskar númeraplötur myndi kosta um 100 milljónir króna.