Adriano: Ég er tilbúinn fyrir endurkomu til Evrópu

Brasilíski framherjinn Adriano hefur gefið út að hann geti nú vel hugsað sér að snúa aftur til Evrópu eftir að hafa hlaðið batteríin á meðan á dvöl hans hjá Flamengo stendur en samningur hans við brasilíska félagið rennur út næsta sumar.

Adriano átti við mikla erfiðleika að glíma utan vallar á síðustu árum sínum hjá Inter en er nú greinilega búinn að finna neistann hjá Flamengo og hefur skorað 19 mörk í 30 leikjum fyrir félagið.

„Ákvarðanir mínar á ferlinum hafa aldrei ráðist af peningum og ég hef því hafnað mörgum boðum til þess að snúa aftur til Evrópu þar sem mér fannst ég ekki vera tilbúinn.

Núna finnst mér ég vera tilbúinn fyrir endurkomu til Evrópu því mér finnst ég hafa þroskast talsvert á tíma mínum hjá Flamengo og það á eftir að hjálpa mér þegar rétta tækifærið býðst til þess að snúa aftur," sagði Adriano í viðtali við brasilíska fjölmiðla í gær.