David Beckham sleit líklega hásin í sigri AC Milan

HM-draumar David Beckham dóu væntanlega í kvöld þegar enski landsliðsmaðurinn sleit líklega hásin í 1-0 sigurleik AC Milan á Chievo í ítölsku úrvalsdeildinni í fótbolta. Beckham meiddist í lok leiksins og varð AC Milan að klára leikinn með tíu menn þar sem liðið var búið með skiptingarnar sínar.

David Beckham var einn með boltann þegar hann fann fyrir sársauka og greip um vinstri hælinn. Beckham var augljóslega sárþjáður og grét sárum tárum þegar hann áttaði sig á því að hann myndi ekki spila á HM í sumar.

„Hann fann kálfavöðvann koma upp sem er einkenni á því þegar þú slítur hásinina. Þetta er mikið áfall," sagði Leonardo, þjálfari AC Milan við Sky TV.

David Beckham er á láni hjá AC Milan frá Los Angeles Galaxy og sóttist aðallega eftir því að spila með ítalska liðinu til þess að auka líkur sínar á að vera valinn í HM-hóp Englendinga.

Clarence Seedorf skoraði eina mark leiksins og AC Milan er þar með aðeins einu stigi á eftir toppliðinu og nágrönnum sínum í Inter Milan.