Askan veldur töluverðu flökti á olíuverði

Samkvæmt frétt á Reuters um málið segir að olíuverðið hafi hækkað eftir að lofthelgi nokkurra Evrópuríkja var opnuð að hluta til í morgun og farþegaflug hófst að nýju. Olíuverðið hafði lækkað í gærdag vegna ört minnkandi sölu á þotueldsneyti í kjölfar þess að askan úr Eyjafjallajökli hafði stöðvað nær allt flug um norðanverða Evrópu frá því fyrir helgina.

Það eru fleiri þættir en askan frá Eyjafjallajökli sem valda flökti á olíuverðinu þessa stundina. Þannig féll verðið um 5% í kjölfar frétta um að Goldman Sachs bankinn hefði verið ákærður fyrir fjársvik í fyrir helgina. Gott uppgjör Citibank í morgun vóg svo á móti þeirri lækkun.

Tony Nunan yfirmaður áhættustýringar hjá Mitsubishi Corp. Segir að Goldman ákæran hafi dregið úr áhættusækni á markaðinum og að það ástand muni vara um einhvern tíma. Hinsvegar muni olíuverðið á endanum ná stöðugleika á verðbilinu 80 til 85 dollarar á tunnuna.