Meiri hætta stafar af Kaliforníu

Forstjóri bandaríska bankans JP Morgan Chase segir að umheiminum stafi muni meiri hætta af efnahagsástandinu í Kaliforníu heldur en efnahagsvandræðum Grikkja. Geti ríkið ekki staðið skil á skuldum sínum geti það haft keðjuverkandi áhrif á önnur ríki Bandaríkjanna og um leið umheiminn. Þetta kom fram í máli forstjórans, Jamie Dimon, á ársfundi fjármálastofnanna á Wall Street í gær.

Ef Kalifornía væri sjálfstæð þjóð væri það áttunda stærsta hagkerfi heimsins. Ríkið glímir við gríðarlegan fjárlagahalla. Ríkisstjórn Grikklands stendur einnig frammi fyrir miklum skuldavanda og hefur kynnt umfangsmiklar aðhaldsaðgerðir. Þeim hefur verið mótmælt harðlega á götum úti undanfarnar vikur. Grikkir þurfa að fá tugmilljarða evra að láni til að reisa landið við.