Eik Bank braut lög um fjármálastarfsemi í Danmörku

Stærsti netbanki Danmerkur, Eik Bank sem er dótturbanki hins færeyska Eik Banki, braut lög um starfsemi fjármálafyrirtækja í landinu. Rannsókn á vegum danska fjármálaráðuneytisins leiðir þetta í ljós.

Í skýrslu fjármálaeftirlitsins um rannsóknina segir að að Eik Bank hafi brotið gegn 71. grein laganna um fjármálafyrirtæki. Þetta er ein af grundvallarreglum laganna og kveður einfaldlega á um að fjármálafyrirtækjum beri að hafa stjórn á rekstri sínum.

Business.dk fjallar um málið en þar kemur fram að fjármálaeftirlitið hafi fundið brotalamir í 19 af 30 stærstu lánasamningum Eik Bank, brotalamir sem sýna að fjárhagsgrundvöllur þessara lána er svo ótraustur að það verði að afskrifa þau. Eik Bank sjálfur telur að þetta eigi aðeins við um 6 af fyrrgreindum lánasamningum.

Fjármálaeftirlitið kemst að þeirri niðurstöðu að áhættustýring bankans hafi verið fyrir neðan allar hellur, skjöl og gögn hafi skort yfir veð og viðskiptaáætlanir hafi skort svo dæmi séu tekin.

Gengi hlutabréfa í Eik Banki heldur áfram að hrapa í kauphöllinni í Kaupmannahöfn. Hafa bréfin lækkað um 23% í dag til viðbótar miklu hrapi í gærdag. Fyrir viku síðan var gengið 70 dkr. á hlut en í dag stendur það í tæpum 30 dkr. á hlut.