Ferrari framlengir samning Massa til 2012

Felipe Massa hefur fengið framlengingu á samningi sínum við Ferrrari liðið. en síðustu vikur hefur verið umræða um að Robert Kubica kæmi í hans stað eða jafnvel Mark Webber. Massa hefur verið með Ferrari frá árinu 2001 og hóf ferilinn sem þróunarökumaður, en hann hefur samtals keppt í 69 mótum og unnið 11 þeirra, 30 sinnum komist á verðlaunapall og 15 sinnum verið fremstur á ráslínu, eins og segir í frétt autosport.com um samning Massa í morgun. Hann ók um tíma með Sauber og þá með Ferrari vél. "Ég er ánægður að fá færi að aka hjá Ferrari næstu tvö ár. Ég hef alltaf ekið með vélar sem hafa verið búnar til í Maranello (hjá Ferrari) og er stoltur að aka hjá liði sem er eins og mín önnur fjölskylda", sagði Massa um málið. Stefano Domenciali framkvæmdarstjóri Ferrari sagði að Massa hefði vaxið sem ökumaður og persóna, bæði við erfiðar aðstæður og þegar gleði ríkti. "Við vildum stöðugleika fyrir framtíðina og teljum að við séum með ökumenn sem standa jafnfætis hvað varðar hraða og möguleika á samvinnu innan liðsins", sagði Domenicali.