Sjælsö Gruppen yfirtekur 16 íbúðablokkir í Óðinsvéum

Í frétt um málið á börsen.dk segir að um sé að ræða fasteignaverkefni sem heiti Promenade byen. Íbúðablokkirnar 16 eru hver með sinni eigin hönnun en tvær þeirra, Stævnen og Broen eru fullkláraðar og búið að leigja út 47 og 68 íbúðum í þeim.

Flemming Joseph Jensen forstjóri Sjælsö Gruppen segir að yfirtakan Promenade byen falli vel að rekstri félagsins. Þriðja blokkin, Sejlet, verður tilbúin í útleigu á næsta ári og þær sem eftir standa verða kláraðar eftir því sem leigjendur í þær finnast.

Yfirtakan fór fram í samvinnu við Aareal Bank og verkefnið er að fullu fjármagnað. Yfirtakan hefur ekki áhrif á væntingar Sjælsö Gruppen um hagnað í ár. Eftir sem áður er gert ráð fyrir tapi á rekstrinum á bilinu 0-250 milljónir danskra kr.

Eins og áður hefur komið fram í fréttum hér á síðunni er FIH bankinn orðinn einn af stærstu eigendum Sjælsö Gruppen. Eftir hlutafjáraukningu fyrr í vetur hjá Sjælsö á FIH bankinn 17% í félaginu en stærsti hluthafinn er SG Nord Holding með 25% hlut. SG Nord er svo aftur að hluta til, eða 100%, í eigu Cube Properties sem er skráð til heimilis á Kýpur.

Cube Properties hét áður Novator Properties og var að 69% í eigu þeirra feðga Björgólfs Guðmundssonar og Björgólfs Thor Björgólfssonar gegnum félagið Samson Holdings. Þrotabú Samson Holding á nú um 60% af hlutunum í Cube Properties. Kröfuhafar Samson séu svo aftur íslenskir og þýskir bankar ásamt lífeyrisjóðum.