Royal Unibrew í slagsmálum við Heineken

Sem kunnugt er af fréttum eru Stoðir stærsti einstaki hluthafinn í Royal Unibrew með 16% og hafa Stoðir gert kröfu um að fá mann í stjórn bruggverksmiðjanna. Straumur á einnig 4% hlut í Royal Unibrew.

Heineken mun vera lítt hrifið af þeim samningi sem Royal Unibrew hefur gert við Cerveceria Nacional Dominicana (CND) í Dóminíkanska lýðveldinu en CND vill kaupa þrjú brugghús sem Royal Unibrew á í Karabíska hafinu.

Maðkurinn í mysunni í fyrrgreindu samkomulagi hefur ekki verið opinber hingað til en kemur fram í greinargerð með hlutafjáraukningunni hjá Royal Unibrew sem nú stendur yfir. Royal Unibrew og Heineken vinna saman að bruggun maltdrykksins Vitamalt en Royal Unibrew selur hann í Karabíska hafinu. Framleiðsluleyfi fyrir Vitamalt er innifalið í samningnum við CND en Heineken vill meina að þeir eigi forgangsrétt að leyfinu og að átt hefði að bjóða Heineken leyfið áður en það var selt til „þriðja aðila".

Samingurinn við CND er svo aftur grundvöllur fyrir hlutabréfaaukningunni en með honum, ef hann verður samþykktur, lækka skuldir Royal Unibrew um 200 milljónir danskra kr. Heildarskuldirnar eru nú um 2 milljarðar danskra kr.

Henrik Brandt forstjóri Royal Unibrew vill draga úr því að þetta muni ráða úrslitum um hvort samningurinn við CND gangi eftir eða ekki. „Það er alveg eðlilegt að við ræðum málin af og til við samstarfsaðila okkar," segir Brandt. „Hér er um viðskiptalegan ágreining að ræða sem við teljum okkur geta leyst."

Heineken vill ekki tjá sig um málið við Börsen en bendir á að ef grundvöllur samkomulags, eins og er í gangi við Royal Unibrew um Vitamalt, breytist geti kaupandinn krafist þess að samið verði að nýju.