Eto'o jafnaði á lokamínútunni - Eiður Smári lék allan leikinn

Eiður Smári Guðjohnsen lék allan leikinn með Barcelona þegar liðið gerði 1-1 jafntefli á móti Deportivo La Coruna í lokaumferð spænsku úrvalsdeildarinnar í kvöld. Þetta var annar deildarleikurinn í röð þar sem Eiður Smári spilar allar 90 mínúturnar.

Það munaði litlu að Barcelona myndi tapa tveimur síðustu deildarleikjum sínum en Kamerún-maðurinn Samuel Eto'o tryggði liðinu jafntefli á lokamínútu leiksins. Deportivo La Coruna var búið að vera yfir frá 30. mínútu leiksins.

Eiður Smári lék á þriggja manna miðju ásamt þeim Seydou Keita og Abraham González. Eiður átti eitt skot í leiknum og það fór framhjá.