Eiður fer ekkert endilega til Englands

Eiður Smári Guðjohnsen segir það alls ekkert víst að hann fari í enska boltann ef hann yfirgefur Barcelona. Spænska stórliðið er tilbúið að selja Eið sem hefur verið orðaður sterklega við West Ham.

„Það virðast allir ganga að því sem vísu að ef ég fer frá Barcelona þá muni ég fara aftur til Englands. En það er spilaður fótbolti víðar en á Englandi svo möguleikarnir eru margir," sagði Eiður.

„Í sannleika sagt þá veit ég ekki hvert framtíð mín liggur," sagði Eiður sem lék fyrri hálfleikinn fyrir Barcelona þegar liðið gerði 1-1 jafntefli við Tottenham í æfingaleik. „Ég þarf að spila, svo einfalt er það. Ég er fótboltamaður og elska þennan leik. Ég vil spila eins mikið og hægt er. Nú er ég bara að einbeita mér að því að komast í mitt besta form," sagði Eiður.