Stærsta einstaka nauðungarsalan í sögu Danmerkur

Stærsta einstaka nauðungarsalan í sögu Danmerkur er nú framundan en hún er auglýst á átta heilsíðum í viðskiptablaðinu Börsen. Um er að ræða 310 íbúðir í Ringsted en íbúðirnar eru hluti af þrotabúi Stones Invest. Meðal kröfuhafa í þrotabúið er Landic Property.

Í umfjöllun Börsen um málið segir að veðin sem hvíli á íbúðunum nemi um 640 milljónum danskra kr. en verðmatið er hinsvegar um 278 milljónum danskra kr. Lánastofnunin BRF Kredit er með 353 milljónir danskra kr. á fyrsta veðrétti og Roskilde Bank með 50 milljónir kr. á öðrum veðrétti. Ekki er reiknað með að neinn annarr en BRF Kredit fái nokkuð upp í veðkröfur sínar.

Vegna umfangs nauðungarsölunnar hefur íbúðunum verið skipt upp í sex „pakka" og geta fjárfestar boðið í hvern þeirra fyrir sig. Eignirnar í heild eru 220.000 fermetrar og þær voru endurnýjaðar árið 2007.

Í september á síðasta ári gerið Landic Property kröfu um gjaldþrot Stones Invest en það var í eigu fjárfestisins Steen Gude. Gjaldþrotabeiðnin var samþykkt í þeim mánuði.

Í fréttum á visi.is frá þeim tíma segir að gjaldþrotabeiðni Landic hafi byggt á kröfu um endurgreiðslu á virðisaukaskatti upp á 7,5 milljónir danskra kr. vegna byggingarframkvæmda í Holbæk. Landic taldi að Stones Invest hafi haldið þessari upphæð eftir og að hún hefði með réttu átt að ganga til Landic.

"Við höfum farið nákvæmlega yfir þetta og teljum okkur örugglega í rétti hvað endurgreiðsluna varðar," sagði Michael Sheik einn af yfirmönnum Landic Property í samtali við Berlingske á þessum tíma. "Ég tel að fleiri kröfur fylgi frá okkur ásamt gjaldbrotabeiðninni á mánudag.

Fram kom að Landic Property telur sig eiga allt að 140 milljónum danskra kr. inni hjá Stones Invest, eða sem svarar til um 3,3 milljarða kr.