Ríkissjóður Dana hagnast um 840 milljarða á bankaaðstoð

Ríkissjóður Danmerkur mun hagnast um 35 milljarða danskra kr. eða um 840 milljarða kr. á aðstoð sinni við banka landsins s.l. vetur. Um var að ræða svokallaða Bankpakke I og II.

Meðal þeirra banka sem sóttu um aðstoðina voru FIH bankinn sem nú er í eigu íslenska ríkisins og báðir færeysku bankarnir sem skráðir eru í kauphöllina.

Í frétt um málið á börsen.dk er haft eftir Niles Storm Steinbæk skrifstofustjóra Fjármálaráðsins (Finansrådet) í Danmörku að ríkið muni ekki tapa neinu á aðstoðinni. „Þvert á móti mun ríkissjóður hagnast um tugi milljarða ef fleiri bankar fara ekki í þrot," segir Steinbæk.

Fjármálaráðið telur að hagnaður ríkisins af Bankpakke I muni nema 15 milljörðum danskra kr. og af Bankpakke II muni hagnaðurinn nema 20 miljörðum í viðbót.

Bankaðstoðin fólst í lánum til danskra banka sem gerðu þeim kleyft að bæta eign- og lausfjárstöðu sína. Ríkissjóður gaf út skuldabréf með 3-4% vöxtum til að borga fyrir „pakkana" en bankarnir borga svo aftur 10% af þeim lánum sem þeir fengu.

Af heildarupphæðinni mun Danske Bank borga mest eða um þriðjung, þ.e. 11,5 milljarða danskra kr.