Um 3.700 Pólverjar á atvinnuleysisbótum í Noregi

Atvinnuleysi meðal Pólverja í Noregi hefur aukist um 555% frá því í apríl í fyrra. Er nú um 3.700 Pólverjar á atvinnuleysisbótum í landinu.

Svipað og gerðist á Íslandi flykktust Pólverjar til Noregs meðan góðærið geisaði þar á síðustu árum. Síðan að fjármálakreppan fór að bíta í við upphaf síðasta árs hefur stöðugt sigið á ógæfuhliðina hjá þessu fólki. Svipað og hérlendis eru það einkum byggingaverkamenn sem orðið hafa fyrir barðinu á auknu atvinnuleysi í Noregi.

Í umfjöllun um málið á vefsíðunni e24.no segir að fyrir utan hinn stóra hóp atvinnulausra er einnig stór hópur sem hefur einfaldlega haldið aftur heim til Póllands þegar fór að þrengja um á atvinnumarkaðinum í Noregi. Hinsvegar neyðist fjöldi þeirra til að vera áfram í Noregi þar sem atvinnuástandið er lítt skárra í Póllandi þessa dagana.

Roy Pedersen talsmaður sambands byggingarverkamanna í Noregi segir að talan 3.700 manns nái aðeins yfir þá sem eru opinberlega skráir atvinnulausir. Hann óttast að hin raunverulega tala sé mun hærri.

Pedersen nefnir sem dæmi að fjöldi Pólverja séu skráðir hjá vinnumiðlunum en þeir fái ekki störf á vegum þeirra nema dag og dag á stangli. Þeir séu samt skráðir eins og þeir séu í fullri vinnu.