Kaupþing eignast veitingahús Roberts Tchenguiz

Skilanefnd Kaupþings hefur eignast meirihlutann í Bay Restaurant Group sem aftur á veitingahúsakeðjurnar La Tasca og Slug and Lettuce. Keðjurnar voru áður í eigu auðmannsins Roberts Tchenguiz.

Í frétt um málið á Timesonline segir að Bay Restaurant Group hafi tilkynnt un endurskipulagingu félagsins þar sem skuldum var breytt í eignarhluti. Það eru Kaupþing og þýski bankinn Commerzbank sem standa að baki endurskipulagninunni. Við hana minnkuðu skuldir Bay Restaurant Group um 100 milljónir punda eða rúmlega 21 milljarð kr, og standa nú í 150 milljón pundum.

Með samkomulagi sem gert var milli fyrrgreindra banka og Bay Restaurant Group eignast Kaupþing meirihluta í félaginu en stjórn þess eignast "umtalsverðan minnihluta" eins og segir í Timesonline.

Þetta er í annað sinn á 18 mánuðum sem Bay Restaurant Group fer í gegnum viðamikla endurskipulagningu en á síðasta ári skipti Roberts Tchenguiz Laurel Pub Company sínu upp í Bay Restaurant Group og Town & City Pub Company.

Roberts Tchenguiz hætti síðan afskiptum sínum af báðum þessum félögum í kjölfar þess að Kaupþing gjaldfelldi hundruð milljóna punda af lánum sínum til hans,

Paul Symonds forstjóri Bay Restaurant Group lýsir yfir ánægju sinni með að fjárhagsstaða félagsins sé loksins komin á hreint. "Það mikilvægasta er að við erum nú fjármagnaðir og getum rekið viðskipti okkar á réttum forsendum," segir Symonds.

Reiknað er með að Bay Restaurant Group, sem rekur 190 veitingastaði, muni skila 25 milljón punda hagnaði fyrir skatta í ár en veltan er áætluð um 175 milljónir punda.