Kauphallarsvindl eykst mikið í Kaupmannahöfn

Ýmiskonar svik og svindl með hlutabréfaviðskipti í kauphöllinni í Kaupmannahöfn hafa aukist mikið á fyrsta helmingi þessa árs.

Fjármálakreppunni er kennt um en bæði stjórnendur kauphallarinnar og fjármálaeftirlit Danmerkur vinna nú yfirvinnu til að halda aftur af þessari þróun.

Í frétt um málið í Jyllands Posten segir að samkvæmt tölfræðilegum upplýsingum frá fjármálaeftirliti Danmerkur hefur eftirlitið meðhöndlað 47 mál tengd kauphallarglæpum á fyrstu sex mánuðum ársins. Til samanburðar voru þessi tilvik 73 talsins allt árið í fyrra og 45 talsins árið 2006.

Mads Mathiassen skrifstofustjóri hjá fjármálaeftirlitinu segir að málafjöldinn sé áfram mikill í samanburði við fyrri ár. Þar að auki nefnir hann að þeim málum fari fjölgandi þar sem erlendir eftirlitsaðilar biðji danska fjármálaeftirlitið um aðstoð í málum sem snúast um grunsamleg kauphallarviðskipti.

Það eru einkum mál sem tengjast markaðsmisnotkun sem hefur farið fjölgandi. Þau voru 19 talsins á fyrri helming ársins í ár m.v. 28 allt árið í fyrra. Af málunum í ár hefur sjö þeirra verið vísað til lögreglurannsóknar.

Það kemur prófessor Jesper Lau Hansen sérfræðingi í kauphallarrétti við háskólann í Kaupmannahöfn ekki á óvart að aukning sé í tilvikum á markaðsmisnotkun þegar fjármálakreppa er í gangi. Fleiri rannsóknir hafi sýnt að bæði stjórnendur og almennir fjárfestar eigi erfitt með að viðurkenna tap.

„Þegar illa gengur hjá fyrirtækjum og einstaklingum á fólk það til að fegra tölurnar og láta líta út fyrir að staðan sé ekki eins slæm og hún er í rauninni," segir prófessorinn.