Stefán skoraði tvö og lagði upp eitt

Stefán Þór Þórðarson fór mikinn er lið hans, Norrköping, vann 3-0 sigur á Sirius í sænsku B-deildinni í knattspyrnu í kvöld.

Stefán lagði upp fyrsta mark leiksins og skoraði svo hin tvö sjálfur. Hann lék allan leikinn í liði Norrköping, rétt eins og Gunnar Þór Gunnarsson. Alls hefur Stefán skorað fjögur mörk í átta leikjum með Norrköping í sumar.

Annað Íslendingalið var í eldlínunni í sömu deild. Sundsvall vann 4-0 sigur á Ängelholm þar sem Ari Freyr Skúlason lék allan leikinn og lagði upp tvö mörk fyrir Sundsvall. Hannes Þ. Sigurðsson var einnig í byrjunarliði Sundsvall en var skipt af velli á 42. mínútu.

Sundsvall er í þriðja sæti deildarinnar með 38 stig en Norrköping því tíunda með 24 stig.

Það var einnig leikið í sænsku úrvalsdeildinni í kvöld. Trelleborg vann Halmstad, 4-0, og kom Jónas Guðni Sævarsson inn á sem varamaður í síðarnefnda liðinu á 73. mínútu.

Ragnar Sigurðsson og Hjálmar Jónsson voru í byrjunarliði IFK Gautaborgar sem gerði markalaust jafntefli við Djurgården á útivelli. Theodór Elmar Bjarnason kom inn á sem varamaður í liðinu á 40. mínútu.

Einn leikur fór fram í norsku úrvalsdeildinni. Sandefjord vann Brann á útivelli, 1-0. Ólafur Örn Bjarnason, Kristján Örn Sigurðsson, Birkir Már Sævarsson og Gylfi Einarsson voru allir í byrjunarliði Brann en Birki Má var skipt af velli á 57. mínútu. Ármann Smári Björnsson var á bekknum hjá Brann.

Kjartan Henry Finnbogason kom inn á sem varamaður í liði Sandefjord á 83. mínútu. Brann er í fimmta sæti deildarinnar með 33 stig og Sandefjord í því áttunda með 28.