Íhuga að stofna NFL-lið í London

Sú tilraun NFL-deildarinnar að hafa einn leik á ári í London hefur algjörlega slegið í gegn og nú eru menn farnir að ræða að stofna lið í London.

Í kvöld verður spilaður NFL-leikur á Wembley en þetta er þriðja árið í röð sem þessi háttur er hafður á. Leikur kvöldsins er heimaleikur Tampa Bay Buccaneers sem mætir New England Patriots.

„Áhuginn á leiknum okkar heldur bara áfram að vaxa og við viljum nýta okkur það. Vonandi getum við komið með fleiri leiki til Bretlands á hverju ári," sagði Roger Goodell, yfirmaður NFL-deildarinnar.

Goodell segir að vel komi til greina að spila einnig í Manchester og Glasgow. Menn fara síðan hugsanlega lengra því byrjað er að spá í því að stofna lið í London.

„Ef við höldum áfram að fjölga leikjum og áhuginn helst þá er kominn grundvöllur fyrir því að stofna lið hérna. Við erum að skoða þetta mál þessa dagana," sagði Goodell.