Væntanlegur stór hluthafi í MP banka sakaður um mútur

Norðmaðurinn Endre Rösjö sem verður að öllum líkindum næststærsti hluthafi MP banka er sakaður um að hafa hótað blaðamanni hjá norska dagblaðinu Dagens Næringsliv og borið á hann fé.

Í blaðinu er Endre Rösjö borinn þungum sökum. Þar er sagt að hann hafi hótað blaðamanni Dagens Næringsliv og boðið honum háar fjárhæðir eða eina millljón norskra króna fyrir upplýsingar um heimildarmenn. Rösjö hefur kært blaðið fyrir umfjöllun þess um viðskipti hans og norska olíufyrirtækisins DNO sem hann telur byggða á stolnum gögnum.

Blaðið fullyrðir að Pinemont Securities, félag í eigu Rösjö hafi haft milligöngu um greiðslur frá DNO til bandarísks erindreka að nafni Peter Galbraiths. DNO á einnig að hafa greitt Galbraith fyrir að hafa auðveldað fyrirtækinu að fá olíusamninga við stjórnvöld í Kúrdahéruðum Íraks árið 2004.

Greint hefur verið frá því að til standi að Rösjö leggi MP banka til nýtt hlutafé og greiði fyrir það um fjórtán hundruð milljónir króna. Að því er fram kemur í Morgunblaðinu kanna forsvarsmenn MP banka nú hvort eitthvað sé á bak við fréttirnir í norska blaðinu. Gunnar Karl Guðmundsson forstjóri MP banka vildi ekki tjá sig um málið. Hvorki náðist í Margeir Pétursson stjórnarformann MP né Sigfús Ingimundarsson varaformann.