Renault menn svekktir með stöðuna

Renault hefur ekki byrjað keppnistímabilið eins vel og væntingar liðsmanna gáfu tilefni til. Spánverjinn Fernando Alonso verður á heimavellli á Barcelona brautinni um næstu helgi.

"Ég er vonsvikinn með það hvernig okkur gekk í fyrstu fjórum mótunum. Við mættum í fyrsta mót með meiri væntingar en við gátum staðið undir. En liðið hefur brugðist vel við stöðunni og í ljósi þess að við erum komnir með tvöfaldan loftdreifi aftan á bílanna, þá mun hagur okkar vænkast", sagði Pat Symonds tæknistjóri um stöðu Renault. Hann hefur verið í tæknimálum liðsins í áratugi og vann tvo meistaratitla með Alonso, sem hefur tvívegis unnið á heimavelli.

Renault verður með ýmsar nýjungar í Barcelona til að bæta yfirbyggingu bílsins og loftflæðið um hana. Það er lykill að góðum árangri á háhraðabrautinni, sem öll lið þekkja mjög vel vegna stöðugra æfinga á veturna á brautinni.

"Við erum hissa hvað samkeppnin er mikil í Formúlu 1 í dag. Hópurinn er mjög þéttur og nýjar reglur hafa aukið samkeppni á milli liðanna. Það er ekkert eitt lið sem sker sig úr og stórliðin hafa fallið í skuggann. Bæði ný útfærsla af dekkjum og yfirbyggingum hefur breytt gangi mála. Ég vona sannarlega að nýr búnaður bæti stöðu okkar í Barcelona", sagði Symonds.