Stærsti kröfuhafinn er skúffufyrirtæki

Írski sjóðurinn sem er stærsti erlendi kröfuhafinn í gamla Glitni er skúffufyrirtæki í eigu þriggja annarra skúffufyrirtækja. Árni Tómasson formaður skilanefndar segir að sjóðurinn tengist stórum bandarískum vogunarsjóði sem nefnist Davidson Kempner.

Írski sjóðurinn Burlington Loan Management er með kröfur í Glitni upp á 150 milljarða. Margt bendir til að þetta sé vogunarsjóður sem hafi keypt skuldabréf í Glitni á eftirmarkaði sem fór af stað í kjölfar bankahrunsins. Írska félagið er því óbeint stærsti einstaki eigandi Íslandsbanka og á um 4% í bankanum.

Sjóðurinn var stofnaður á þessu ári og er skráður til húsa hjá lögfræðistofu í Dyflinni á Írlandi. Engar upplýsingar fást þar.

Samkvæmt írsku fyrirtækjaskránni er hann í eigu þriggja skúffufyrirtækja, sem eru Badb CHaritable Trust Limited

Eurydice Charitable Trust Limited og Medb Charitable Trust Limited.

Öll félögin eru skráð á heimilisfang lögfræðistofunnar. Þá eru þrír stjórnarmenn skráðir á Burlington Loan Management Limited.

Doherty Orlagh skráð til heimilis í Dyflinni, Conor Bastable skráður til heimils í New York og sá þriðji er Michael Herzog til heimilis í Lundúnum.

Árni Tómasson formaður skilanefndar Glitnis segist lítið vita um sjóðinn en þeir sem standi á bakvið hann séu skuldabréfaeigendur og tengist stærri vogunarsjóði sem nefnist Davidson Kepmneir Capital Management með höfuðstöðvar í New York. Hann segir kröfuhöfum ekki skylt að koma fram undir nafni.Þeir sem vilji hins vegar fara með ráðandi hlut í bankanum þurfi að fara í gegnum formlegt ferli hjá Fjármálaeftirlitinu og gefa upp allar upplýsingar. Árni segir því engar líkur á því að erlendur vogunarsjóður sé að eignast Íslandsbanka.