Fyrsti heimsmeistaratitillinn í augsýn hjá Khan

Breska vonarstjarnan Amir Khan fær stærsta tækifæri sitt á ferlinum þann 27. júní í sumar þegar hann mætir heimsmeistaranum Andreas Kotelnik í veltivigt, en Úkraínumaðurinn er handhafi heimsmeistaratitilsins hjá WBC sambandinu.

Khan er 22 ára gamall og kemur frá Bolton á Englandi. Hann vann sigur á mexíkósku goðsögninni Marco Antonio Barrera í síðasta mánuði og ætlar nú að færa sig upp um þyngdarflokk í leit sinni að sínum fyrsta heimsmeistaratitli.

"Það er frábært að berjast um heimsmeistaratitilinn í aðeins 22. bardaga mínum á ferlinum. Þetta eru bestu tíðindi sem ég hefði geta fengið og nú er bara að fara og vinna bardagann," sagði Khan.