Smásala í Bandaríkjunum dróst saman í júní

Smásala í Bandaríkjunum dróst töluvert saman í júní. Reuters fréttastofan segir að mánuðurinn hafi verið sérstaklega erfiður verslunum sem selja sumarvörur því fyrstu þrjár vikurnar í júní hafi verið kaldari og blautari en venjulegt er.

Reiknað er með að smásala hafi fallið um 4,8%, en sölutölur Wall-Mart verslananna eru ekki með í þeim útreikningum. „Neytendur horfast enn í augu við of miklar hindranir," sagði Patricia Edwards, hjá Storehouse Partners, sem sér um greiningar á smásölumarkaðnum. Hún segir að það skýrist af miklu atvinnuleysi og litlu lausafjármagni í umferð.

Smásala jókst hins vegar lítillega eða um 0,5 prósent í maí miðað við 1,1 prósenta lækkun í aprílmánuði og þótti það þá benda til þess að efnahagssamdrátturinn í landinu væri á undanhaldi.