Roy Jones Jr: Ég er enn sá hraðasti í bransanum

„Þegar ég set hanskana á mig þá er ég enn jafn hraður og ég var áður. Ég er enn sá hraðasti í bransanum," sagði Roy Jones Jr eftir sigur sinn gegn Jeff Lacy í bardaga landanna í Mississippi í Bandaríkjunum.

Hinn fertugi Jones Jr fór á kostum í hringnum og Lacy gafst upp eftir tíundu lotu en þá var hann orðinn illa útleikinn. Jones Jr opnaði skurð fyrir ofan hægra auga Lacy strax í þriðju lotu og í sjöundu lotu voru bólgur í kringum augu Lacy orðnar áberandi miklar.

„Ég gaf áhorfendunum bara það sem þeir vildu sjá og ég elska enn að gera það sem ég geri," sagði Jones Jr sem vann þar með sinn annan bardaga í röð eftir tapið gegn Joe Calzaghe á síðasta ári.

Jones Jr er heldur ekkert að íhuga að hætta á næstunni og mætir Danny Green næst í september og mun bardaginn fara fram í Ástralíu.