Gengið frá félagaskiptum Eiðs síðdegis

Eiður Smári Guðjohnsen mun semja við AS Monaco nú síðdegis en hann hefur í morgun gengist undir ýmis konar próf í tengslum við læknisskoðun félagsins.

Vísir hefur heimildir fyrir því að Eiður hafi þegar gengist undir stærstan hluta læknisskoðarinnar í morgun. Hún klárast þó ekki fyllilega fyrr en eftir hádegi og þá verður gengið frá félagaskiptunum.

Monaco kaupir Eið Smára frá Barcelona og hafa franskir fjölmiðlar rætt um að kaupverðið sé þrjár milljónir evra. Eiður hefur einnig samið um kaup og kjör við félagið og hefur samþykkt tveggja ára samning.

Hann lék með Barcelona í þrjú ár en var þar áður hjá Chelsea í ensku úrvalsdeildinni í sex ár.