Gömul sjónvörp eru tuga milljóna virði

Talið er að gömul sjónvörp frá millistríðsárinum muni fara á tugi milljóna kr. á uppboði sem haldið verður í þessari viku. Það er uppboðshaldarinn Bonhams sem stendur fyrir uppboðinu.

Í boði er heilt safn af 758 gömlum rafmagnstækjum, þar á meðal eru 26 sjónvörp sem smíðuð voru á fjórða áratugnum. Talið er að þetta safn í heild muni fara á eina milljón punda eða um 200 milljónir kr. Talið er að aðeins um 500 sjónvörp séu enn til í heiminum frá þessum tíma, að því er segir í umfjöllun á business.dk.

Safnið sem hér um ræðir hefur Michael Bennett-Levy frá Edinborg byggt upp á síðustu 30 árum en það er talið það stærsta sinnar tegundar sem enn er í einkaeign.

Meðal muna í safninu, fyrir utan sjónvarpstækin, eru fyrstu vasareiknivélarnar frá árinu 1971 en verðmæti þeirra er áætlað 40-60 þúsund kr., rafknúinn hárblásari frá 1920 sem metinn er á 90 til 140 þúsund kr., gamlar ritvélar og blýantsyddarar og fyrstu fartölvurnar af gerðinni Osborn og Commodore sem metnar eru á 80 til 160 þúsund kr.

Þá er mögulegt að bjóða í fyrstu tölvuna sem sett var á almennan markað árið 1958 en hún er af gerðinni LEO II. Er hún metin á um 400 þúsund kr.