Pacquiao og Mosley í viðræðum um bardaga

Hnefaleikakapparnir Manny „Pacman" Pacquiao og „Sugar" Shane Mosley eru í viðræðum um að mætast í hringnum og mun bardaginn líklega fara fram í október á þessu ári.

Hinn þrítugi Pacquiao nánast niðurlægði Bretann Ricky Hatton á dögunum í annarri lotu í bardaga þeirra í léttveltivigt en Bandaríkjamaðurinn Mosley sem er 37 ára gamall vann Antonio Margarito í níundu lotu í bardaga þeirra í veltivigt sem fram fór í janúar.

„Nú þegar Manny er búinn að samþykkja að berjast við mig, þá er aðeins skirffinskan eftir og það er verið að vinna í þeim málum núna," segir Mosley.

Bæði Pacquiao og Mosley höfðu verið orðaðir sem líklegir andstæðingar sigurvegarans úr bardaga Floyd Mayweather yngri og Juan Manuel Marquez og það gæti vitaskuld enn gerst.