Verð á lúxusíbúðum í London hefur hrapað

Verð á lúxusíbúðum í London hefur lækkað um 20% frá því í maí í fyrra að því er segir í frétt um málið á Bloomberg fréttaveitunni.

Samkvæmt úttekt frá Knight Frank LLP er niðurskurður í starfsmannahaldi hjá bönkum og fjármálastofnunum ástæðan fyrir þessu hrapi en þetta fólk var aðalkaupendahópurinn að þessum íbúðum fyrir fjármálakreppuna.

Talið er að starfsmönnum banka og fjármálastofnanna í borginni umi fækka um 60.000 talsins fram til næsta árs frá hámarkinu sem fjöldinn náði árið 2007.

Liam Bailey fasteignasérfræðingur hjá Knight Frank telur þó að botninum á þessum markaði sé náð og að verðin séu á uppleið aftur. Bendir hann á að milli apríl og maí hafi verið á íbúðum sem kosta meir en eina milljón punda hækkað um 1,6%. Er það annað skiptið í röð sem verðið hækkar milli mánaða.

Liam reiknar hinsvegar með að verðin nái ekki hámarki sínu að nýju fyrr en árið 2014.

Íbúðirnar sem hér um ræðir eru staðsettar í hverfunum Mayfair, St. John's Wood, Regent's Park, Kensington, Notting Hill, Chelsea, Knightsbridge, Belgravia og South Bank.

Til samanburðar má geta að fasteignaverð í heild í Bretlandi hefur lækkað um 11% að meðaltali frá því í maí í fyrra.