Gunnar Sigurðsson stjórnarformaður Hamleys eftir uppstokkun

Gunnar Sigurðsson fyrrum forstjóri Baugs í Bretlandi var kjörinn stjórnarformaður leikfangaverslunarkeðjunnar Hamleys eftir uppstokkun í stjórninni. Skilanefnd Landsbankans fer nú með 63,7% hlut í Hamleys en sá hlutur var áður í eigu Baugs.

Í frétt um málið á vefsíðu RetailWeek segir að með uppstokkuninni hafi tveir af forstjórum Hamleys látið af störfum sem og um 20 starfsmenn á aðalskrifstofu keðjunnar.

Guðjón Reynisson aðalforstjóri Hamleys vildi ekki tjá sig um ástæðu þess að Gunnar var ráðinn stjórnarformaður í samtali við RetailWeek en vefsíðan nefnir að það sé vel þekkt að þeir tveir séu vinir.

Aðrir í stjórn Hamleys eftir uppstokkunina eru Sally Ingleson forstöðumaður áhættufjárfestinga hjá Landsbankanum, Pétur Halldórsson fyrrum forstjóri hjá Fons, sem áður átti 35% hlut í Hamleys og Alasdair Dunn fjármálastjóri keðjunnar. Talið er að skilanefnd Kaupþings fari nú með hlut Fons og er Hamleys því að nær öllu leyti í íslenskri eigu.

Paul Currie, fyrrum aðalforstjóri Hamleys yfirgaf stjórnina í maí s.l. og mun ekki ráðið í stöðu hans. Innkaupastjórinn Diane Lee yfirgaf stjórnina um svipað leyti.

Guðjón Reynisson segir að stjórn Hamleys sé nú komin í góðan gír. „Við erum á flugi, allt er á áætlun og fólk ætti ekki að hafa áhyggjur af Hamleys," segir Guðjón.

Gunnar Sigurðsson er áfram í stjórn Iceland, House of Fraiser, Whistles og Aurum sem allt eru fyrrum félög sem Baugur átti hlut í.