Cristiano Ronaldo skoraði, klikkaði á víti og fékk rautt spjald

Cristiano Ronaldo fékk tvö gul spjöld með fjögurra mínútna millibili í lok 4-2 sigurleiks Real Madrid á Almería í spænsku úrvalsdeildinni í kvöld. Real Madrid lenti 1-2 undir en skoraði þrjú mörk á ellefu mínútna kafla og tryggði sér mikilvægan sigur í toppbaráttunni við Barcelona.

Cristiano Ronaldo skoraði fjórða mark Real en hann hafði einnig lagt upp fyrsta mark leiksins fyrir Sergio Ramos. Almería komst í 2-1 með mörkum á 58. og 62. mínútu en Gonzalo Higuaín, Karim Benzema og Ronaldo tryggði Real þrjú stig með þremur mörkum frá 73. til 84. mínútu.

Cristiano Ronaldo fékk fyrra gula spjaldið fyrir að fagna marki sínu en seinna spjaldið fékk hann fyrir að fella Juanma Ortiz, leikmann Almería. Ronaldo hafði einnig klikkað á vítaspyrnu áður en Benzema kom Real yfir.

Real Madrid er þar með tveimur stigum á eftir Barcelona sem er núna að spila erfiðan leik við Deportivo La Coruna á útivelli.