Rússar of blankir til að kaupa ný jakkaföt á Lenin

Fjármálakreppan hefur leikið Rússland svo grátt að stjórnvöld þar í landi hafa ekki lengur efni á nýjum jakkafötum handa Lenin þar sem hann liggur smurður í opinni líkkistu sinni við Rauða torgið.

Í frétt um málið í Ekstra Bladet segir að einn af ráðgjöfum Dimitri Medvedevs forseta Rússlands hafi nýlega kveðið uppúr með það að Lenin muni áfram liggja þar sem hann er þrátt fyrir að stjórnarandstaðan geri kröfu um að þessi fyrrum leiðtogi Sovétríkjanna sálugu sé jarðaður á eðlilegan hátt nú 85 árum eftir andlát hans.

Margir Rússar standa enn í þeirri trú að þessi fyrrum einn blóðugasti einræðisherra í sögunni sé sómi Rússlands, sverð þess og skjöldur.

En vandamálið nú er að ekki er til fjármagn til þess að viðhalda líki Lenins á sómasamlegan hátt. Ekstra Bladet vitnar í frétt í rússneska blaðinu Trud þar sem fram kemur að eftir síðustu endurnýjun á smurningu Lenins hafi ekki reynst nægilegt fé eftir til að geta keypt ný jakkaföt á líkið.

Venjan hefur verið sú að þriðja hvert ár hefur líkið verið klætt í ný jakkaföt. Þau eru handsaumuð og úr forláta svissneskri ull. Þetta voru föt sem Lenin sjálfur var vanur að kaupa þegar ferill hans stóð sem hæst. Nú eru Rússar of blankir til að splæsa í ný jakkaföt og eflaust snýr Lenin sé við í gröfinni við þessar fregnir að sögn Ekstra Bladet.