Luciano Spalletti áfram með Roma - Tekur Ciro Ferrara við Juventus?

Ítalska félagið Roma hefur staðfest að Luciano Spalletti verði áfram knattspyrnustjóri félagsins en Spalletti var sterklega orðaður við stjórastöðuna hjá Juventus eftir brottrekstur Claudio Ranieri frá Tórínófélaginu.

Spalletti á enn tvö ár eftir af samningi sínum við Roma en eftir slakt tímabil, þar sem Roma endaði í sjötta sæti deildarinnar og náði ekki markmiðum sínum í Meistaradeildinni, var talið líklegt að leiðir myndu skilja. Eigendur Roma hafa hins vegar sannfært Spalletti að vera áfram, alla vega til loka núgildandi samnings.

Tíðindin þykja jafnframt án mikils vafa verða til þess að greiða leiða Ciro Ferrara að stjórastöðunni hjá Juventus, en þessi fyrrum varnarmaður og fyrirliði Juventus tók við sem bráðabirgðastjóri eftir brottrekstur Ranieri.