Framhaldið í höndum Bjarna - ekki næst í Sigurjón eða Halldór

Engar ákvarðanir voru teknar á þingflokksfundi Sjálfstæðisflokksins sem haldinn var í gærkvöldi. Þingmenn samþykktu að framhald málsins yrði í höndum Bjarna Benediktssonar, formanns flokksins.

Bjarni sagði í samtali við fréttastofu eftir fundinn að samkvæmt þeim upplýsingum sem hann hefði fengið væri það annar bankastjóri Landsbankans sem tók ákvörðunina um styrkveitinguna en að öðru leyti vildi hann ekki tjá sig um þær ákvarðanir sem teknar voru í Landsbankanum fyrir tveimur árum.

Bankastjórarnir voru tveir á þessum tíma, þeir Sigurjón Árnason og Halldór J. Kristjánsson.

Fréttastofa hefur hvorki náð tali af Halldóri J. Kristjánssyni né Sigurjóni Árnasyni, fyrrverandi bankastjórum Landsbankans.