Adriano þarf á hjálp að halda

Fyrrum unnusta vandræðagemsans Adriano hjá Inter Milan segir að leikmaðurinn þurfi nauðsynlega á hjálp að halda og segist vera orðin hundleið á því að hugsa um hann.

Það er ítalska blaðið Gazzetta Dello Sport sem grefur þessa frásögn stúlkunnar upp úr brasilískum fjölmiðlum.

"Adriano er gjörsamlega týndur og þarf á hjálp að halda. Ég hef ekki þrek til að hugsa um hann lengur. Ég hef alltaf hugsað um hann en hann hefur aldrei sýnt mér neina virðingu. Hann hefur aldrei gert neitt fyrir mig," sagði Joanna Machado.

Ítalska blaðið heldur því fram að Adriano sé aftur kominn í slagtog með gömlu vinum sínum í Brasilíu sem nú hafa snúið sér að eiturlyfjasölu.

Kappinn er sem stendur í Brasilíu og forráðamenn Inter bíða þess að honum þóknist að snúa aftur til Ítalíu.