Bókhaldshneyksli hjá Viðskiptaskóla Kaupmannahafnar

Stjórn Viðskiptaskóla Kaupmannahafnar, Copenhagen Business School, glímir nú við töluvert bókhaldshneyksli sem fyrrum rektor skólans lét eftirmanni sínum í té er hann lét af störfum í ágúst s.l.

Samkvæmt umfjöllun um málið í Jyllands Posten mun rektorinn fyrrverandi, Finn Junge-Jensen, hafa farið verulega frjálsum höndum um sérstakan stjórnarsjóð skólans. Afleiðingarnar eru að núverandi rektor, Johan Roos, hóf ferill sinn með 18 milljónir danskra kr., eða um 450 milljónir kr. í skuld við sjóðinn.

Umræddur sjóður er til ráðstöfunar fyrir rektor skólans til ýmissa tilfallandi verkefna. Finn Junge-Jensen virðist hafa mokað úr sjóðnum til hægri og vinstri síðustu mánuði sína sem rektor.

Sjóðurinn er 15 milljónir dankra kr. að stærð en þegar Johan Roos tók við honum hafði rektorinn fyrrverandi skuldbundið sjóðinn til að greiða 33 milljónir danskar til hinna og þessa aðila.

Jyllands Posten segir að yfirstjórn skólans hafi fundað um málið bakvið luktar dyr þegar í ágústmánuði. Í framhaldi af þeim fundi var ákveðið að fella niður öll fjárveitingaloforð Finn Junge-Jensen sem voru umfram 15 milljóna danskra kr. hámarkið. Þar að auki var endurskoðunarfyrirtækið Ernst & Young fengið til að fara yfir bókhald skólans.

Anders Knutsen formaður stjórnar skólans segir að þar að auki hafi verið ákveðið að leggja umræddan sjóð niður.