Glitnir selur Moderna Life fyrir tæpa 4 milljarða

Glitnir hefur selt sænska tryggingarfélagið Moderna Life til breska tryggingarfélagsins Chesnara. Söluverðið er rétt rúmlega 30 milljónir dollara eða tæplega 4 milljarða kr.

Moderna Life var áður í eigu Milestone í gegnum dótturfélag sitt í Svíþjóð

Reuters greinir frá þessu í dag og vitnar í tilkynningu frá Chesnara um málið. Fylgir sögunni að Chesnara sé á höttunum eftir fleiri eignum í fjarmálaþjónustugeiranum.

Í tilkynningunni segir að stærð Moderna Life muni ekki koma í veg fyrir getu Chersnara til að leita eftir öðrum fjárfestingartækifærum. "Chesnara er með skýra stefnu um að kaupa vel staðsettar eignir í fjármálaþjónustugeiranum," segir í tilkynningunni.

Moderna Life var með 74.000 viðskiptavini við árslok 2008. Tekjur þess á árinu námu 152 milljónum sænskra kr. eða tæpir 2,3 milljarðar kr. Félagið skilaði tapi á árinu upp á 31 milljón sænskra kr. eða um 450 milljónum kr.

Chesnara er einkum þekkt fyrir að hafa fest kaup á tryggingarfélaginu Westminster Assurance árið 2005.