Barcelona til í að selja Eto´o

Framherjinn Samuel Eto´o er talinn verða að samþykkja nýjan tveggja ára samning við Barcelona ef hann vill vera áfram í herbúðum félagsins. Hann hefur hingað til ekki viljað setjast að samningaborðinu og Pep Guardiola þjálfari er því farinn að leita að nýjum framherja.

Eto´o var næstum farinn sömu leið og Ronaldinho og Deco fyrir síðasta tímabil en vann sér sæti í liðinu á ný og spilaði vel. Nú hefur Barca aftur á móti sett honum stólinn fyrir dyrnar. Annað hvort skuldbindur hann sig félaginu eða fær að fjúka.

Man. City og Inter eru bæði talin fylgjast með stöðu mála af miklum áhuga. Samningur Eto´o rennur út eftir næsta tímabil og félagið hefur engan áhuga á að missa hann án þess að fá nokkuð fyrir sinn snúð.

Talið er að Guardiola vilji fá David Villa frá Valencia í staðinn fyrir Eto´o.