Kaupþing mun eignast 90% hlut í Mosaic Fashion

Tískuvöruverslanakeðjan Mosaic Fashion sem er í 49% eigu Baugs er á leið í greiðslustöðvun. Félagið mun þó að öllum líkindum fara í endurskipulagningu á fjórum aðal vörumerkjum sínum, Oasis, Warehouse, Coast og Karen Millen. Það er breska blaðið Times sem greinir frá þessu í morgun.

Samkvæmt frétt Times mun Kaupþing eignast 90% hlut í félaginu í stað þeirra 400 milljóna punda sem félagið skuldar en Kaupþing er stærsti lánadrottinn félagsins.

Deloitte sem hefur séð um mál lánadrottna Mosaic mun hafa mælt með greiðslustöðvun og mun taka yfir félagið ef kaupandi finnst ekki.

Skilanefnd Kaupþings mun vera við það að hallast að endurskipulagning sem mun halda Mosaic ósködduðu.

Skilanefndin vonast til þess að þetta muni hámarka verðmæti félagsins til langtíma litið í stað þess að það verði selt á brunaútsölu.